مساحة إعلانية

الرئيسية / / المقالة التى غيرت حياة الكثيرون (مواقع , اداوات و طرق اتقان اللغة الانجليزية )

المقالة التى غيرت حياة الكثيرون (مواقع , اداوات و طرق اتقان اللغة الانجليزية )



 اليوم سوف اقدم لكم مقالة رائعة عن تعلم اللغة الانجليزية وافضل المواقع التى كانت السبب فى تغير حياة بعض الاشخاص الكثيرون عن طريق اتقان اللغة الانجليزية..




علشان تطور الانجليزي عندك محتاج تشتغل على اربع محاور رئيسية وهم الاستماع ... القراءة ... الكتابة ... التحدث.

 
1- الاستماع
اسمع ولو ربع ساعة كل يوم لاذاعة السي ان ان ... أو اي راديو بالانجليزي... ممكن تسمع و انت بتلبس علشان رايح شغلك او رايح جامعتك الصبح .... ممكن كمان وانت فاتح فيس بوك :) :)
أسمع و اقرا مع بعض ... ممكن ولو مرتين في الاسبوع أو أكتر ... تجيب اي نص لقصة قصيرة و تسمع الاوديو بتاعها ... انت ودانك هتبقي مركزه في الكلام اللي بيتقال .. وعنينك هتبقي مركزه على النص اللي انت بتسمعه ... وياريت بقي لو توقف كل شوية و تحاول تقلد الكلام اللي انت بتسمعه ... هتشوف نتايج هايلة :).


 
2- القراءة
- القراءة مهمة جدا و بتساعدك على انك تسترجع الكلمات اللي انت عارفها قبل كده و كمان تكتسب كلمات جديدة و الاهم من ده وده هتلاقي انك تدريجيا تركيبة الجملة عندك بتتظبط .... ممكن تعمل الانشطة دي علشان تشتغل على مهارة القراءة .
أقراء مقال بالانجليزي ... قصة قصيرة بالانجليزي .. اي صفحات على الفيس انجليزية فيها بوستات بالانجليزي اقرا البوستات دي .. مقال واحد كل يوم مش هياخد من وقتك عشر دقايق .... ممكن تقرأ في الاوقات دي ....في المواصلات ..... بالليل وانت رايح تنام من على موبايلك ...او انت عند الدكتور مستني دورك ....الخ!
القراءة بصوت عالي .... من الانشطة المهمة جدا في انها تطور عندك النطق و كمان السرعة في القراءة .
كل اللي هتعملة انك هتختار اي مقال من المقالات اللي انت بتقراها فوق .. او اي قصة صغيرة .. هتقراه 3 ملات ورا بعض .. وبعدين تبدأ بقي تسجل لنفسك وانت بتقرا المقاله دي ... بعدها اسمع نفسك .. قيم نفسك .. شوف أخطاءك.
- تحفظ كل يوم 5 كلمات بس :)
من المقالات و البوستات و القصص القصيرة اللي هتقراها .. هتطلع منها بشوية كلمات انت مش عارفهم ...اختار خمس كلمات منهم كل يوم واحفظهم .... بس الاهم من انك تحفظهم انك تستخدهم في جمل من تركيبك انت... في تطبيق مهم اسمه Ankiapp ده تطبيق تحفة هو عبارة عن قاموس انت بتعمله من الكلمات اللي انت مش عارفها و تسجها في القاموس و كل يوم بتدخل عليه مرة واحده مش هتاخد منك دقيقتين .. بتراجع الكلمات دي .


3- الكتابة
الكتابة مهمة لانها بتساعدك تحرك نهر اللغه الراكد في قاع الذاكرة عندك ... حلوة نهر اللغة دي .. ايه جو أبي الاسود الدؤلي داهون :D :D .. نهر اللغة اللي عندك من كلمات و قواعد و تراكيب ... كل اللي ممكن نعمله اننا نكتب كل يوم خمس أو عشر جمل عن اللي حصل معانا .. زي مذكرات كده ... و احتفظ بيها في مذكره او اجندة خاصة بيك علشان تشوف تطورك في الكتابة يوم بعد يوم ... طبعا متنساش تستخدم الكلمات الجديدة االي انت بتحفظها في كتاباتك دي .. لانك لما تستخدمها مرة واتنين و تلاته عمرك ما هتنساها :)
ممكن تكتب قبل ما تروح تنام ... نسيب شويه الفيس اللي لازم نفتحه من الموبايل تحت الباطنية واحنا رايحين ننام .. علشان نعمل تشيك ان تحت البطانية  ... او ممكن تكتب وانت في المواصلات على موبايلك ...! ولو هتقولي مش هعرف اخطائي .. بسيطة في موقع اسمه Grammarly ده انت بتنسخ اللي انت كاتبه و هو بيطلعلك الاخطاء  


:D






4- التحدث
اتكلم انجليزي من غير تحضير لمده خمس دقايق كل يوم .. ارتجل
اختار اي موضوع .. موقف حصل معاك و ابدا اتكلم عنه وانت فاتح التسجيل في الموبايل عندك .. ابدا بقي شغل دماغك و ارتجل وفكر في اللي انت عايز تقوله . طبعا هتلاقي في الاول آآآآآآ ...... أأأأأأ كتير بس مش مشكلة تدريجا هتقل ال آآآآآآآ دي وهتتظبط .. لان التحدث من اسهل المهارات و اسرعها تطورا ... من الاخر عُك لحد ما ربنا بفكها معاك وتتظبط :)
ممكن برضو تسجل يومياتك بس من غير ما تقرا اللي انت كاتبه  .. ارتجل .. لخبط ..عك ... فكر .. حاول ... اغلط .. حاول تاني ... وصدقني هتظبك معاك
- فكر بالاتجليزي ! .... ايه ؟!! أيون فكر بالانجليزي
فكر في كل حاجة حواليك بالانجليزي .. 3 قايق كل يوم هتتعب فيهم عقلك في انك تفكر بالانجليزي ... ممكن قبل ما تنام تفكر في اللي انت عملته انهارده .... ممكن الصبح تفكر قبل ما تقوم من السرير في اللي انت هتعمله انهارده .. ممكن تفكر في كل حاجة بتقابلها حواليك و انت في المواصلات ... إلخ!!
الاول هنبدأ بكلمات لمدة اسبوعين نبدأ نفكر في كل حاجة حواليا بس على هيئة كلمات زي مثلا chair ... car .... boy ... door و هكذا
بعدين بقي بشويه هنبدأ نفكر في فقرات كبيرة عن حاجت تسلسلية عملناها .. زي موضوع تعبير بس بالانجليزي ومن غير ما اكتبه .. و لا حتي انطقه .. هفكر فيه .. لسان حالي هو اللي هتيكلم .... حلوة لسان حالي دي مش كده :D :D
بعدين بقي هنبدأ نفكر في جمل بسيطة زي مثلا ...I ate pizza .... I went to work ... I bought a mobile .. وهكذا
خلي بالك الاول هتلاقي الموضوع صعب شويه بس تدريجيا هتلاقي الدنيا ظبطت .. لان انت بتمرن مخك على حاجة غريبه عليه .. فهتتعب شويه .. بس اضغط على نفسك و افتكر انك عايز تتكلم انجليزي .. افتكر اللحظة اللي بتتزنق فيها علشان تقول كلمتين على بعض و مش بتعرف ... وقتها بتتضايق من نفسك و نفسوياتك بتتعب .. اتعب علشان توصل للي انت عايزه ... خلى الاشواك اللي هي الاوقات اللي بيتطلب منك انك تتكلم لكنك بتفشل .. تعلمك انك لازم تشتغل على نفسك .. علشان يجي الوقت اللي تقول فيه زي ما قال أونكل طاغور (شكرآ للاشواك .. فقد علمتي الكثير!) :)
- القواعد
خلى معاك كتاب قواعد بسيط .. تلجأ ليه لما تتزنق في اي حاجة أو ممكن ببساطة تتابع اي قناة من القنوات اللي تحت.










افضل المواقع والقنوات التى تساعدك على اتقان اللغة الانجليزية 

دي شوية قنوات تحفة على اليوتيوب هتساعدك كتير
Anglo-Link. (دي قناة هتساعد في القواعد )
Rachel’s English. ( دي بقي ست لذيذة هتخليك ازاي تنطق زي الامريكان )
)Learn English with Jennifer. دي بقي ست كُمل فيديوهاتها شاملة كل حاجة في اللغة )
English for you ( دي بقي كورس عبارة عن 80 فيديو كل فيدو مدتة تقريبا 50 دقيقة ... عيش بقي  )
دروس أون لاين ( المهندس اللذيذ ده هيخليك تحب القواعد بكل دوشتها و عكها )

دول بقي شوية مواقع ع الماشي www.voscreen.com ( بيقدم ليك تمارين على القواعد) www.droosonline.com ( ده الموقع بتاع المهندس اللذيذ فيه تمارين برضو كتير ) www.italki.com (ده بقي موقع للتواصل مع الاجانب عايزين يتعلمو عربي أو مصريين ببيتعلموا انجليزي) www.learnenglish.de (ده برضو موقع شامل قواعد بقي كلمات و كده ) www.grammarly.com )ده موقع تصحيح الاخطاء اللغوية )
دي بقي شوية تطبيقات للدردشة و التعارف على ناس من حول العالم بتتعلم لغة
Speaky Hello Talk Italki
دي بقي تطبيقات علشان تجيب مقالات تقراها :D
English essays
English passage practice
Essays- 100+ English essays

أظن كده بقي ملكش حجة  ... كل اللي انت محتاجه شوية عزيمة و حبة ارادة .. و خليك فاكر ان الانسان هو ايه غير حبة ارادة على عزيمة و شوية حاجات كده فوق بعض   
Take the first step in faith, you don't have to see the whole staircase, just take the first step.
اكيد مستني الترجمة :D :D
بيقولك .. كل اللي انت محتاجة انك تبدأ .. تاخد أول خطوة في طريق ايمانك بالحاجة اللي بتعملها .. مش لازم الطريق كله يبقي واضح قدامك .. انت بس خد الخطوة الاولي .. لان زي ماحنا عارفين ان اصعب شيء البداية .. ابدأ انت بس و هتلاقي الدنيا اتظبطت ..!! وخليك فاكر انك وانت سايق عربيتك بالليل و الدنيا ظلمة .. كشافات العربية مش بتنورلك الطريق كله .. هي بس بتنورلك مترين بس قدامك ... بس في الاخر .. هي بتكون نورتلك الطريق كله .. بس المهم انك تمشي معاها و تاخد خطوات للامام علشان تكمل تنوير باقي السكة الظلمة ..:D :D
حي على الجهاد بقي :D :D

تم اعداد هذه المقالة من صديق لى أ/ محمد رستوم أستاذ اللغة الانجليزية الشهير :) 
شارك المقال
جميع الحقوق محفوظة لــ شروحــات 4 عرب | شروحات,التقنية,الهواتف,الحاسوب 2016 © تصميم كن مدون